अहमदको धर्मपत्र

अहमदको धर्मपत्र

यो प्रार्थना दु:ख वा संकटमा पाठ गर्यो भने यसको अत्यन्त ठुलो प्रभाव पर्नेछ |

उनै हुन् सम्राट, सर्वज्ञ, सर्व बुद्धिमान् ! हेर, स्वर्गीय कोकिल, पवित्र एंव मीठा आलापहरूद्वारा निर्मल मन भएका मानिसहरू समक्ष परमात्माको सामीप्यको आनन्ददायक शुभ समाचारहरूको उद्घोषणा गर्दै, दैवी एकत्वमा श्रद्धा राख्ने भक्तजनहरूलाई दयालु परमेश्वरको सामिप्यको दरबारमा आमन्त्रित गर्दै, प्रभु प्राप्तिको निम्ति अन्य सबैसंग छुट्टिनेहरूलाई ती सम्राट, भा:वान, अद्वितिय परमेश्वरको प्रेरणाद्वारा प्रकट गरिएको सन्देशको जानकारी गराउँदै, तथा प्रेमीहरूको पवित्रात्माको आसन, अनि यो देदिप्यमान सौन्दर्य प्रभातर्फ मार्गदर्शन गराउँदै अनाध्द्न्त वृक्षका हाँगाहरूमा गाउँदैछ |

नि:संशय यो त्यही महान् सौन्दर्य हो, जसको निम्ति भविष्यवाणीहरू प्राचीन ईश्वरीय अवतारहरूका पवित्र ग्रन्थहरूमा उल्लेख गरिएका थिए, यसैद्वारा सत्यलाई भ्रमदेखि छुट्टयाइनेछ तथा प्रत्येक आज्ञालाई बुद्धिको कसीमा जोखिने छ | नि:सन्देह, ऊ स्वयं जीवन वृक्ष हो, जसले अत्युच्च, प्रबल, महान् परमात्माको उत्तम फल उब्जाउने गर्दछ |

हे अहमद ! तिमी साक्षी देऊ कि अवश्य पनि उनी नै परमात्मा हुन् अनि सम्राट, अतुलनीय, सर्व–शक्तिमान्, संरक्षक, उनीबाहेक अन्य कोही पनि परमात्मा छैन | अनि अली नामद्वारा (बाब) जसलाई उनले पठाएका छन्, साँच्चै नै परमात्माका तर्फबाट उनी आएका हुन् र जसका आज्ञाहरुको हामी सबै पालन गर्दछौं |

भन: हे मनुष्य ! भा:वान तथा प्रबुद्ध परमात्माले “बयान” मा जुन आज्ञाहरु निर्धारित गरेका छन्, त्यसको पालन गर | नि:संशय उनै हुन् ईश्वरावतारहरूका सम्राट तथा उनैको ग्रन्थ मातृग्रन्थ हो | यदी तिमीहरूले यस सत्यलाई चिन्न मात्र सकेको भए |

यसरी यो कोकिलले यस कैदखानाबाट आफ्नो पुकार उद्घोषित गर्दैछ | यो स्पष्ट सन्देश दिनु नै यसको काम हो | जसले चाहन्छ ऊ यी उपदेशहरूबाट अलग्ग रहन सक्दछ अनि जसले चाहन्छ ऊ स्वेच्छापूर्वक आफ्नो परमात्माको मार्गमा हिंड्न   सक्छ |

हे मानिसहरू हो, तिमीहरूले यी श्लोकहरूलाई अस्वीकार गर्दछौ भने ईश्वरलाई कुन प्रमाणद्वारा मानेका छौ ? त्यस प्रमाणलाई प्रस्तुत गर, हे झुट्ठाहरूको     समुदाय ?

होइन, जसको हातमा मेरो आत्मा छ, तिनै ईश्वरको शपथ, उनीहरू सबैले एकत्रित भै एक अर्काको सहायता गर्न थाले तापनि यस्तो न त गर्न सक्दछन् र न कहिल्यै गर्न सक्नेछन् |

हे अहमद ! मेरो अनुपस्थितिमा मेरा प्रदानहरूलाई नबिर्से | तिम्रा दिनहरूमा मेरा दिनहरूको र यस दुर्गम कैदखानाको मेरो निर्वासन र त्यहाँ मैले पाएका दु:ख–सास्तीहरूलाई स्मरण गरे | अनि मेरो प्रेममा तिमी यति दृढ बन कि तिमीमाथि शत्रुहरूको तरबार बर्से तापनि तथा स्वर्ग एवं पृथ्वी सबै तिम्रा विरुद्ध आइलागे तापनि तिम्रो हृदयमा कत्ति पनि शंका उत्पन्न नहोस् |

तिमी मेरा शत्रुहरूसमक्ष अग्निको ज्वाला समान तथा मेरा प्रियजनहरूप्रति अमर जीवनको सरिता बन | उनीहरूझैं नबन जो मप्रति विश्वास राख्दैनन् |

मेरो मार्गमा तिमीमाथि विपत्तिहरू आइपरे भने र मेरो निम्ति तिमीलाई अपमानित हुनुपर्यो भने पनि तिमी नहडबडाऊ |

परमात्मामाथि आस्था राख, जो तिम्रा ईश्वर हुन् अनि तिम्रा पूर्वजहरूका पनि ईश्वर हुन् | किनभने, मानिसहरू स्वयं आफ्नै आँखाहरूद्वारा ईश्वरलाई देख्न नसकेर तथा आफ्नै कानहरूद्वारा प्रभुको आलाप सुन्न नसकेर, स्वविवेकबाट वन्चित भएर, मिथ्या एंव भ्रमहरूको कुबाटोमा भौंतारिरहेका छन् | हामीले तिनीहरूलाई यस्तै पायौं जसको साक्षी तिमी पनि छौ |

यसरी उनीहरूका अन्धविश्वास उनीहरू आफै र आफ्ना अन्तस्करणबीचका पर्दा बनेका छन्, जसले गर्दा उनीहरू सर्वश्रेष्ठ, अत्यन्त महान्, परमेश्वरका पवित्र मार्गबाट विचलित भएका छन् |

तिमी आफै निश्चिन्त रहू कि नि:संशय जो यस परम सौन्दर्यबाट विमुख हुन्छ त्यो पुर्व युगहरूका ईश्वरावतारहरू देखि पनि छुट्टिएको छ अनि अनादिकालदेखि अनन्तकालसम्म परमात्माको विरुद्ध घमण्ड प्रदर्शन गरिरहेछ |

हे अहमद ! तिमीले यस धर्मपत्रको राम्ररी पाठ गर, आफ्ना दिनहरूमा मधुर स्वरमा यसको पाठ गर एंव स्वयंलाई यसबाट वन्चित नगराऊ, किनभने नि:संशय यसलाई पाठ गर्नेहरूको निम्ति ईश्वरले एक सय शहिदहरूको कर्मफल तथा लोक–परलोक दुवैमा सेवाको पारितोषिक निश्चित गरेका छन् | यी सबै कृपाहरू हामीले आफ्नो तर्फबाट कृपाको तथा हाम्रो उपस्थितिको करुणाको रुपमा तिमीलाई प्रदान गरेका छौँ ताकि तिमी ती कृतज्ञहरू मध्येका हुनेछौ |

ईश्वरको शपथ ! जो कोही पनि विपद् वा दु:खमा छ उसले पूर्ण इमान्दारीका साथ यस धर्मपत्रलाई पाठ गर्यो भने अवश्य पनि परमेश्वरले उसको दु:ख हरण गर्नेछन्, उसका विपत्तिहरू हटाउनेछन् र उसका कष्टहरूको निवारण गर्नेछन् |

नि:संशय उनै हुन् परम दयालु तथा करुणामय | परमात्माको स्तुति होस्, उनै हुन् सर्व–ब्रह्माण्डहरूका भगवान् |

-बहाउल्लाह